ആലപ്പുഴയില്‍ ഗുജറാത്തിയില്‍ വോട്ടു ചോദിച്ച് ചുമരെഴുത്ത്. ‘പാക്കൂച്ചേ എല്‍ഡിഎഫ്, അല്‍പയാന്‍ സത്തക്ക് വികാസ് മാട്ടേ.
എല്‍ഡിഎഫ് ഒമിദ്വാര്‍ ശ്രീ. പി. പി. ചിത്തരഞ്ജന്, ആപ്‌നോ മത്ത് ദയ് ജിത്താവോ’ ഇങ്ങനെയൊക്കെയാണ് ആലപ്പുഴയില്‍ ചിലയിടത്തെ ചുവരുകളില്‍ ഗുജറാത്തിയില്‍ എഴുതിപ്പിടിപ്പിച്ചിരിക്കുന്നത്.
നിയമസഭ തെരഞ്ഞെടുപ്പില്‍ ആലപ്പുഴയില്‍ മലയാളത്തില്‍ മാത്രമല്ല, ഗുജറാത്തി ഭാഷയിലും വോട്ടുതേടിയുള്ള പ്രചാരണത്തിന്റെ ഭാഗമാണിത്.
സീ വ്യൂ വാര്‍ഡിലെ ഗുജറാത്തി സ്ട്രീറ്റില്‍ സ്ഥിരതാമസമാക്കിയ ഗുജറാത്തികളുടെ വോട്ടുറപ്പിക്കാനാുള്ള അടവാണിത്.
ഗുജറാത്തികള്‍ക്ക് ഒറ്റനോട്ടത്തില്‍ കാര്യം പിടികിട്ടും. മലയാളികള്‍ തലപുകച്ചാലും കാര്യംപെട്ടെന്ന് മനസ്സിലാകില്ല. തൊട്ടടുത്ത ചുവരില്‍ മലയാളത്തില്‍ എഴുതിയ വരികള്‍ വായിച്ചാല്‍ കാര്യം എളുപ്പമായി.
‘ഉറപ്പാണ് എല്‍. ഡി. എഫ്, ആലപ്പുഴയുടെ വികസനത്തിനുവേണ്ടി എല്‍. ഡി. എഫ് സ്ഥാനാര്‍ഥി പി. പി. ചിത്തരഞ്ജന് നിങ്ങളുടെ വിലയേറിയ വോട്ട് നല്‍കി വിജയിപ്പിക്കണം’ എന്നാണത്.
ഇവിടെ മലയാളത്തില്‍ മാത്രമായി ചുവരെഴുതിയാല്‍ പണി പാലുംവെള്ളത്തില്‍ കിട്ടും. പതിറ്റാണ്ടുകളായി കൂട്ടത്തോടെ താമസിക്കുന്ന ജൈനരും വൈഷ്ണവരുമായി നൂറുകണക്കിന് ഗുജറാത്തി കുടുംബങ്ങളുണ്ട്.
കച്ചവടം അരങ്ങുവാണിരുന്ന കാലത്ത് ഇവിടെ 1500ലേറെ കുടുംബങ്ങള്‍ സ്ഥിരതാമസക്കാരായി ഉണ്ടായിരുന്നു.
കഴിഞ്ഞ നിയമസഭ തെരഞ്ഞെടുപ്പില്‍ തോമസ് ഐസക്കും തദ്ദേശ തെരഞ്ഞെടുപ്പില്‍ യു.ഡി.എഫിന്റെ അഡ്വ.റീഗോരാജുവും ഗുജറാത്തി ഭാഷയില്‍ ചുവരെഴുതിയിരുന്നു.
തെരഞ്ഞെടുപ്പ് അടുക്കുമ്പോള്‍ മാത്രമാണ് രാഷ്ട്രീയക്കാര്‍ ഇവരെ ഓര്‍ക്കുന്നത്. എന്നാലും ഇവര്‍ക്ക് പരിഭവമില്ല. വോട്ടെടുപ്പ് ദിവസം പ്രായമായവര്‍ വരെ ബൂത്തുകളില്‍പോയി വോട്ട് ചെയ്യും. എന്നാല്‍, ഇവരുടെ രാഷ്ട്രീയനിലപാടുകള്‍ എന്താണെന്ന് ആര്‍ക്കും നിശ്ചയമില്ല.
